Одложено е судењето за случајот Тврдина 2 во Кривичниот суд за 2 октомври. МВР треба да го извести судот дека поранешниот началник на Петтата управа во МВР, Горан Грујовски како обвинет и неговиот колега во УБК, Никола Бошковски како сведок, се недостапни.
На судењето, беа присутни 6-те обвинети службенички во УБК.
Адвокатот Петар Василев на судијката Лидија Петровска, на мобилен ѝ покажуваше слики од минатото судењe при што побара да не се објавуваат слики од судењата.
СЈО ги сомничи, Грујовски и уште шестмината вработени во УБК, за уништување службена документација поврзана со незаконското прислушување. Претходното рочиште на 3 јули беше одложено на барање на одбраната.
Грујовски и Бошковски, кој исто така е обвинет од СЈО, веќе два месеца се во бегство и по нив е распишана и меѓународна потерница. Тие не се достапни од 18 јули, откако Врховниот суд по повеќедневно пролонгирање им го потврди притворот што претходно го одреди Кривичниот суд.