Еврејската заедница во Република Македонија и Фондот на холокаустот на Евреите од Македонија денеска ќе го одбележат Јом Ашоа – Национален комеморативен ден на холокаустот и херојството на Државата Израел во сеќавање на востанието на Евреите во Варшавското гето во 1943 година и Комеморативен ден на 6 милиони Евреи убиени во холокаустот.
Комеморацијата ќе се одржи во Меморијалниот центар на холокаустот на Евреите од Македонија, во некогашното еврејско маало, при што ќе се открие споменикот „Македонски паметник за жртвите на холокаустот“, ќе се запалат шест меморијални свеќи и ќе биде отворена детската изложба „Холокаустот низ призмата на детските очи“ во соработка со Министерството за образование и наука, Фондацијата „ФОРУМ – ЗФД“ и Градот Скопје.