Во спомен паркот Моклиште кај кавадаречкото село Ваташа денеска беа одбележани 72 години од стрелањето на 12-те ваташки младинци. Историски час пред присутните одржа Мики Камчевски, професор по историја во гимназијата „Добри Даскалов” од Кавадарци.
– Денес ваташани со задоволство и гордост се потсетуваат на своите славни херои, но еден од тие спомени предизвикува горчина во нивната душа и немир во нивните срца, а тоа е споменот на стрелањето на 12-те ваташки младинци од страна на бугарскиот фашистички окупатор, еден од најкрвавите настани за време на Втората светска војна во Македонија, нагласи Камчевски.
Многу години по ваташката трагедија, сите слободољубиви луѓе и сите оние кои ја ценат и почитуваат саможртвата, истакна тој, знаат дека сето она што го направија младинците од Ваташа за слободата на својот народ, е дело за восхит и почит и дело кое секогаш ќе остане како траен белег да се помне и почитува од денешните и генерациите кои доаѓаат. – Нема ништо посвето од слободата на татковината и слободата на својот народ, додаде тој.
Пред присутните се обрати и градоначалникот на Кавадарци Александар Панов, а беше изведена и богата културно уметничка програма.