Јавното обвинителство отвори предмет за кривично дело „предизвикување на национална, расна и верска омраза“ за интонирањето на албанската химна на првиот академски час на Државниот универзитет во Тетово.
Јавниот обвинител Љупчо Шврговски за МИА изјави дека ќе се побара од полицијата да утврди кој е организатор за да може потоа да одлучат дали ќе поведат официјална кривична постапка.
„Во врска со информациите коишто преку медиумите беа пласирани дека е интонирана химна на странска држава во ДУТ, Јавното обвинителство по службена должност формира РО предмет за кривично дело предизвикување национална, расна и верска омраза, раздор и нетрпеливост со член 319. Преку тој РО предмет ќе побараме од полиција да се утврди кој е организаторот за да можеме по разгледување на предметот да одлучиме дали ќе поведеме и официјална кривична постапка“, изјави обвинителот Шврговски.
Новата академска година на Државниот универзитет во Тетово на 17 септември почна со интонирање на албанската химна. На настанот присуствуваше и заменик-министерот за образование и наука Сафет Незири, кој изјави дека настанот не треба да се проблематизира бидејќи станува збор за химна на албанското знаме, а не химна на друга држава.