Обвинителството на денешното судско рочиште во завршните зборови за случајот „Дива населба“ побара доживотен затвот за сите 37 обвинети за тероризам и терористичка организација, додека одбраната побара увид и најави дека нејзините завршни зборови ќе ги каже на следното рочиште, закажано за 28 јули.
Обвинителството на рочиштето објаснуваше кој бил напаѓач, кој бил логистика и помагал групата илегално да премине од Косово во Македонија, кој го обезбедил оружјето, а кој храна.
Дел од лицата обвинети во случајот, коментираа дека тоа што го зборува обвинителот е невистина. Тие и нивните адвокати, побараа увид во завршните зборови, за на наредното рочиште да ги изнесат нивните.
Судењето за „Дива населба“ започна на 9 февруари лани, откако заврши неколкумесечната истрага. Во овој случај обвинети се 37 лица за тероризам и терористичка организација.
На 9 и на 10 мај 2015 година во кумановската „Дива населба“ вооружена група се судри со безбедносните сили. Во престрелката загинаа осум полицајци од специјалните и посебните единици на МВР, додека четириесетина беа тешко повредени. Убиени беа и десет лица од вооружената група.