Три дена пред киднапирањето на Вања, на 24.11.2023 имало неуспешен обид за нејзино грабнување, покажуваат снимките разгледани на денешното рочиште за убиството, а беа презентирани како доказ на Обвинителството. Се работи за снимки од безбедносни камери, а на кои се гледа куќата и дворот на еден од обвинетите, Велибор Манев.
На видеонадзорот од 21 и 22 ноември 2023 година, вечерта пред да биде убиен Панче Жежовски се гледаат сите четворица обвинети за грабнувањето и убиството, односно обвинетите Љупчо Палевски, Влатко Кешишев, Боре Видевски и Велибор Манев.
Според снимките, Манев доаѓа во куќата со возило заедно со Боре Видевски, а потоа во куќата со „рено кангу“ доаѓаат Љупчо Палевски и Влатко Кешишев.
-На една снимка од дворот на Манев во Велес, се гледа како тројца обвинети вршат тестирање дали радиостаниците функционираат. Забележливо е дека Палевски на јакната има закачено микрофон, а исто имаат и Манев и Видевски. Од записите се гледа дека Палевски носи јакна која има три бели ленти на ракавите, а Манев носи тренерка која на ракавите има три бели ленти- појасни обвинителката Ана Стојковиќ Димитровска на денешното рочиште.
По извесно време обвинетите се гледа од снимката како се организираат за нешто, внесуваат работи во кангуто, Кешишев се прекрстува и за кусо време се упатуваат во правец кон Велес.
Потоа беа прикажани снимки од 24 ноември 2024 година, денот кога е направен обид за грабнување на малолетната Вања.