Педесетина конзерватори од Македонија денеска учествуваа на обуката „Консолидација на камен и камени градби“ што се одржа во работните простории на археолошкиот локалитет Стоби. Беа презентирани најсовремени материјали во оваа област, а предавач беше Леонардо Борџоли, конзерватор-хемичар од Фиренца.
Директорите на конзерваторските центри и музеи од Република Македонија дискустираа со стручни лица од Италија за можностите за имплементација на современата опрема во Македонија. На обуката присуствуваа и претставници од Министерството за култура и Управата за заштита на културното наследство.
Во рамки на оваа обука, Конзерваторскиот центар од Скопје организираше работилница на тема „Методологија на конзерваторско-реставраторска постапка за непосредна заштита на движните и недвижните културни добра“. Предавач беше Латив Озел конзерватор-хемичар од Музејот на анатолски цивилизации од Анкара.
Организатори на обуката се АКАДЕМИЈА РЕСТАУРО, специјализирана компанија во областа на конзервацијата и реставрацијата, ЦТС – најголем производител на конзерваторско-реставраторска опрема во Европа, Конзерваторскиот центар од Скопје, Управата за заштита на културното наследство и Археолошкиот локалитет Стоби.