Стручните екипи на Конзерваторскиот центар-Скопје завршија со обновата на фасадите на два објекта лоцирани на булеварот „Илинден“. Оваа активност беше превидена во рамки на повеќегодишниот проект на Министерството за култура за обнова и конзервација на фасади во значајните градски јадра во повеќе градови во државава.
Како што информира Министерството за култура, изведени се конзерваторско-реставраторски интервенции на објектите со број „41“ и „63“ лоцирани во споменичката целина „Дебар маало“ кои, како што се наведува, претставуваат значајно културно наследство од почетокот на 20 век со архитектонско стилски вредности од раната модерна.
– Објектите кои имаат станбено-деловна намена се изградени во периодот меѓу двете светски војни, а поради своето впечатливо архитектонско решение имаат третман на споменично наследство и токму поради тоа беа реставрирани во автентичен стил, стои во соопштението.
Националната установа Конзерваторски центар-Скопје ги изработи и проектите за конзервација и реставрација на зградите со број „68“ и „80“, исто така лоцирани на булеварот „Илинден, по што во следниот период ќе пристапи кон нивна реализација.
Во рамки на проектот за обнова и конзервација на фасади во значајните градски јадра во повеќе градови во државава, до 2017 година е предвидена интервенција на 250 фасади од значајните споменични целини. Конзерваторскиот центар-Скопје во изминатиот период ја заврши обновата на фасадата на објект лоциран во Старата скопска чаршија.
Заводите за заштита на културното наследство и конзерваторските центри, како активни чинители во спроведувањето на овој проект, годинава реализираа проекти за обнова на фасади на староградските куќи во Охрид, Гевгелија, Крушево, Кратово и Кичево.