Дваесетина дечиња од Центарот за подобрување на квалитетот на животот на лицата со интелектуална попреченост „Порака нова“ добија новогодишни пакетчиња од Црвениот крст-Струга.
Пакетчињата, како што информира секретарот на Црвениот крст – Струга Адуриме Даути традиционално, четврта година се донација од ЕВН Македонија и КЕЦ Струга.
– И годинава Црвениот крст со партнерите се погрижија да внесат радост кај дечињата со посебни потреби. Ќе продолжиме и понатаму да помагаме и да ги поддржуваме оние на кои им е потребна помош, истакна Даути.
Секретарот на „Порака нова“ Анита Гагоска посочи дека дечињата во Центарот се радосни пред новогодишните празници и активно се вклучени во подготовките на честитки, китењето елка, а посебно се радосни на подароците, кои пристигнуваат од секаде.
– Пред Нова година дечињата секогаш очекуваат подароци. Но, јас би порачала не само за Нова година, туку постојано да мислиме на лицата со попреченост и да излегуваме во пресрет на нивните потреби, нагласи Гагоска.