Претседателот на Собранието од претходниот состав, Трајко Вељаноски попладнево закажа конститутивната седница на новиот пратенички состав за петок во 13 часот.
„Врз основа на член 63 од Уставот на Република Македонија кој предвидува дека новоизбраното Собрание се состанува на конститутивна седница најдоцна 20 дена од одржаните избори и конститутивната седница ја свикува претседателот на Собранието од претходниот состав, Вељаноски ја закажа конститутивната седница на деветтиот парламентарен состав за петок, 30 декември 2016 година во 13 часот“, информира Собранието преку соопштение.
Пратениците од новиот состав избрани на 11 декември денеска ги добија уверенијата од Државната изборна комисија. Претседателот на ДИК, Александар Чичаковски кажа дека извештајот за завршените предвремени парламентарни избори освен до Собранието е испратен и до Агенцијата за медиуми, а истиот ќе биде објавен и на официјалната страна на ДИК.