Град Скопје денеска официјално ја започна реконструкцијата на велосипедската и пешачката патека на булеварот „Крсте Мисирков“ од крстосницата со булеварот „Гоце Делчев“ до влезот на чаршијата во должина од 440 метри.
На почетокот со градежните работи на тротоарот присуствуваа градоначалниците на Скопје и Чаир, Коце Трајановски и Изет Меџити, како и претставници од ЈП „Улици и патишта“.
– Имајќи предвид дека овој дел беше многу руиниран, со овој зафат практично ќе добиеме средена велосипедска и пешачка патека. Покрај ивичниците планираме да поставиме и столбчиња со што ќе се оневозможи паркирање на возила, а во текот на есенскиот период ќе биде обновен и дрворедот на патеката, истакна Трајановски.
Градоначслникот на Скопје информира дека во подготовка е и оградата која ќе биде поставена на булеварот „Крсте Мисирков“ од пешачкиот со семафор до пешачкиот премин кај мостот кон Чаир со што ќе се оневозможи непрописно претрчување преку булеварот.
Градоначалникот на Чаир Меџити нагласи дека со овој проект на Градот Скопје како и со идните заеднички проекти покрај уредувањето на патеката ќе се овозможи лојална конкуренција на тезгите кои плаќаат со што ќе се овозможат добри услови како за трговците, така и за граѓаните кои пазарат на Битпазар и на „Пластичарската улица“
Реконструкцијата на пешачката и велосипетска патека која изнесува 2.750 квадратни метри ќе ја изведува ЈП „Улици и Патишта“, а за овој проект Градот ќе издвои 2.4 милиони денари.