СДСМ укажува дека економската криза и економско-социјалната состојба во Република Македонија се продлабочува и поприма многу сериозни размери, а ова го покажуваат сите клучни економски индикатори. Индустријата, велат,девет месеци е во агонија, извозот опаѓа, земјата практично е веќе во рецесија, а компаниите се гушат во незапаметена беспарица.
„Невработеноста повторно почна да се зголемува, и покрај нечесните обиди на власта да вештачки влијае врз оваа категорија со бришење на невработенита луѓе од евиденцијата на АВРМ.ДЗС објави уште еден разочарувачки факт дека секој трет граѓанин на оваа земја и натаму живее во сиромаштија, и за жал извесно е дека оваа бројка до крајот на годината ќе се зголемува. Посебно загрижува тоа што дури 41% од граѓаните кои живеат во сиромаштија се млади луѓе на возраст до 39 години,31% од овие граѓани се со високо или вишо образование, а владата троши пари за реклами со кои не убедува дека образованието е сила образованието е моќ“, изјави Марјанчо Николов.
Државната каса, рече, и по ребалансот е повторно празна и Владата до крајот на годината најверојатно ќе мора да прави уште еден ребаланс, со кој повторно кратењата ќе падне врз грбот на граѓаните и фирмите.
„Сето ова може да се избегне, а кризата може да се ублажи доколку Владата итно запре со непродуктивните трошења, а милионите евра кои секојдневно ги расфрла за споменици, панорамски тркала, рекламни кампањи, барокни фасади и други бесмислени проекти, да ги насочи кон отплата на долгот кон стопанството и отворање на нови работни места“, рече Николов.
