Марјанчо Николов од СДСМ денеска истакна дека македонската економија се наоѓа во состојба на незапаметена неликвидност, која според него извира од неспособноста на Владата навреме и редовно да ги отплаќа своите долгови кон компаниите.
Николов рече дека овој проблем добива загрижувачки димензии и се заканува целосно да го задуши стопанството. Според него, јасно е дека компаниите немаат пари.
„Но, неликвидноста изразена во бројки покажа колку е навистина тешка кризата во домашната економија. Најновите податоци на Народната банка се фрапантни – дури половина од активните компании во земјава, односно 37.754 се блокирани. Вкупниот број блокирани сметки на приватни фирми, пак, заклучно со мај, достигна 58.131.
Додека компаниите во Македонија се гушат во неликвидност, Министерството за финансии извлече нови 70 милиони евра од домашниот пазар, преку издавање на државни записи, со што дополнително ја стимулира и онака тешката неликвидност во стопанството.
За да се ублажи неликвидноста во македонското стопанство, СДСМ веќе неколкупати излезе со предлог мерки кои сеуште и стојат на Владата на располагање:
Прво: Веднаш да го објави долгот на државните институции кон приватниот сектор по основ на неисплатени побарувања и долгот на Владата по основ на поврат на ДДВ.
Второ: Итно да ги исплати сите долгови кон стопанството, што ќе претставува најголема финансиска помош на компаниите во време на криза.
Трето: Најпрво да го намали, а потоа и сопре задолжувањето кај домашните банки и другите финансиски институции и со тоа да му ги остави на стопанството ликвидните средства за работа.
Огромните средства кои се расфрлаат за непродуктивни трошоци се основа за еконмската криза и генератор на неликвидноста во стопанството. Владата треба да престане со трошењето за реклами, фасади, тажни врби, златни огради и споменици а со тие средства да се раздолжи кон стопанството“, рече Николов.