Локална самоуправа Неготино објави оглас за доделување на општинска награда и признанија за заслужни неготинчани во општествениот живот, а по повод Денот на ослободувањето на градот за време НОБ, 8 Ноември.
– Наградата и признанијата се доделуваат секоја година како израз на највисоко општинско признание, што се доделува за посебни постигнувања во одредени области на поединци и институции од општината. Според одлуката, наградата и признанијата по повод 8 Ноември се доделуваат на поединци, претпријатија и други организации, установи, здруженија на граѓани и заедници чии дела, резултати во работењето и дејствувањето, придонеле за нивна лична и афирмација на општина Неготино, појасни портпаролот Методи Митрев.
Право на поднесување на кандидатури за добитници на наградата и признанијата имаат сите заинтересирани граѓани, претпријатија, установи, здруженија, месни заедници и групи граѓани, а крајниот рок за доставување предлози до архивата на општина Неготино е 23 октомври. Пристигнатите предлози најпрво ќе ги разгледа Комисијата за награди и признанија при општинскиот совет, а конечната одлука за добитниците ја донесуваат советниците во Советот на општина Неготино.
Наградите и признанијата на добитниците, градоначалникот на општина Неготино, Тони Делков ќе им ги додели на свечената седница, која ќе се одржи на 8 Ноември.