Потпретседателката на Собранието на Република Македонија, Сузана Салиу, денеска имаше средба со претседателката на Собранието на Република Албанија, Јозефина Топали.
Како што соопшти собраниската прес-служба, за време на неформалниот ручек, соговорничките, уште еднаш ја отвориле темата за добрата парламентарна соработка што ја имаат Македонија и Албанија.
Тие разговараа за исклучително важната улога на парламентите во правец на евроинтеграциите, како и за важноста за одржување фер и демократски избори, за севкупниот демократски дух на овие две држави, кога се знае дека и двете се во почетокот на изборниот процес, на локалните избори, кои ќе се одржат во Македонија во март, како и на парламентарните избори во Албанија, предвидени за јуни, се наведува во соопштението.
Салиу и Топали разговарале и за многу други прашања во врска со улогата, одговорностите и предизвиците кои ги чекаат пратениците на овие две собранија.
