Претседателот на СДСМ, Зоран Заев, придружуван од заменик претседателката Радмила Шекеринска попладнето имаше средба со специјалниот претставник на Германија за Западен Балкан, Ернст Рејчел придружуван од амбасадорката на Сојузна Република Германија во Република Македонија, Кристине Д. Алтхаузер.
Тема на средбата беа динамиката на спроведување на обврските од Договорот во Пржино и неопходните реформи за фер и демократски избори.
Заеднички е констатирано дека не се дозволиви доцнења и одложувања на обврските од договорот во Пржино и дека клучен предуслов за фер и демократски избори е доследно спроведување на Договорот.
-Фокусирани сме на реализација на договореното во Пржино. Очекувањата на граѓаните се фер и демократски избори и ние одлучно работиме кон таа цел од којашто нема да отстапиме, рече претседателот Заев.
На состанокот се разговараше за потребата од доверлив Избирачки список, за брзо затворање на прашањето за медиумите, кои во најголем дел се под контрола на власта, како и за потребата да се обезбедат сите услови за почеток на работата на специјалната јавна обвинителка.