Навистина е неверојатно колку лесно денес некои адвокати бараат трагедијата со 63 мртви деца да се прогласи за „несреќа“. Несреќа е кога природата ќе удри без предупредување, но кога со години институции дозволуваат небезбеден објект да работи, тоа не е несреќа, тогаш тоа е системско замижување, изјави Александар Наунов, татко на загинатата Надица во пожарот во дискотеката „Пулс” во Кочани.
Наунов, во изјава за медиумите на паузата на денешното рочиште во судницата во Идризово, реагираше на изјавата на адвокатот Петре Шилегов, бранител на Шофкет Хазари, на минатото рочиште дека треба да се преиспита обвинителниот акт.
– И навистина е цинично денес да слушаме дека луѓето во судницата „не знаеле зошто седат таму“. Седат таму затоа што 63 деца и млади лица не седат повеќе никаде. Пожарот можеби го запали искра. Но системот му ја отвори вратата. И токму затоа, на следниот Марш на ангелите, јавно ќе се чита обвинението за Шофкет Хазари — за целиот народ да слушне како изгледа кога корупцијата со години се потпишува, премолчува и прикрива, сè додека една општина не ја плати цената со животите на своите деца, изјави Наунов.
Шилегов на претходното рочиште за пожарот во дискотеката „Пулс” реагирше на обвинителниот акт и побара преквалификација на делото, бидејќи, како што посочи, според него поголемиот дел обвинети немаат никаква вина за катастрофалната трагедија.
