„Судско одмерување на казните и практична примена на алтернативните мерки во македонското законодавство“ е темата на научната и стручна расправа што ја организира денеска Здружението за кривично право и криминологија на Македонија (ЗКПКМ) во соработка со Здружението на судии и Германската фондација за меѓународна правна соработка.
Целта на расправата е да се анализираат предностите и предизвиците при практичната примена на законот во насока на воедначување на казнената политика, како и примената на алтернативните мерки во судската практика на Република Македонија.
Ќе учествуваат домашни и странски експерти (универзитетски професори и практичари) кои преку дебата со релевантни правници и претставници од правосудството ќе подготват препораки и предлози од конференцијата.
По завршувањето на расправата, со цел подигнување на свеста кај експертската јавност во однос на овие прашања, ќе биде издаден нов број од Македонската ревија за казнено право и криминологија.