Над 40 автобуси од Куманово изутрина во 6 часот се испратени на технички преглед поради што учениците во Куманово останаа без превоз, а многумина и доцнеа на работните места.
Полицијата на технички преглед ги испрати автобусите на четири транспортни компании-Јоцо Турс, Глобус, Штуз и Оли Травел.
Сопствениците на компаниите не знаат што е причината за ваков итен преглед на автобусите и мини бусите и се надеваат дека до попладне ќе се нормализира автобускиот превоз.
Техничкиот преглед, како што информираше портпаролката на МВР, Марија Јаковлевска се спроведува врз претходно подготвен план за утврдување на техничка исправност на автобуси и товарни моторни возила.
– Од досега извршениот технички преглед, утврдено е дека девет автобуси се технички неисправни, а во три имало претовар на ученици, изјави Јаковлевска.
Таа нагласи дека техничкиот преглед се уште трае, а дополнителни информации ќе има подоцна во текот на денот.