Началникот на ГШ на АРМ генерал-потполковник Горанчо Котески ги презентираше капацитетите и можностите на Центарот за обука на пилоти на осмата Конференција на началниците на генералштабовите на армиите од балканските земји, што одржува денеска во Сараево.
Учесниците на конферецнијата, според соопштението од Министерството за одбрана, покажале голем интерес за Центарот за пилоти.
На маргините од конференцијата, се очекува генералот Котески да оствари повеќе билатерални средби со своите колеги, началници на генералштабови кои учествуваат на конференцијата.
Присуството во Босна и Херцеговина, НГШ на АРМ ќе го искористи и за посета на македонскиот контингент во мисијата АЛТЕА сместен во кампот Бутмир, Сараево.
На конференцијата во Сараево, која ја отвори заменик министерот за одбрана на Босна и Херцеговина, Живко Марјанац, покрај началникот на заедничкиот штаб на Вооружените сили на Босна и Херцеговина генерал-мајор Анто Јелеч, како домаќин, учествуваат и началниците на генералштабови од Албанија, Бугарија, Грција, Романија, Србија, Турција и Црна Гора. Како гости присуствуваат началникот на генералштабот на Вооружените сили (ВС) на Словенија, заменикот на НГШ на ВС на Хрватска, Претседавачот на Воениот комитет на ЕУ, заменикот на Претседавачот на Воениот комитет на НАТО, Командантот на Здружената команда на НАТО во Неапол, командантот на ЕУФОР и командантот на НАТО штабот во Сараево.
На конференцијата се дебатира за понатамошното јакнење на добрите меѓусоседски односи и соработката на полето на одбраната во насока на зацврстување на безбедноста на Балканот и пошироко, како и продолжување на започнатите процеси за заемно справување со современите безбедносни предизвици, иницирани на претходните конференции. Прифатена е иницијативата за изградба на заеднички способности за дејствување при елементарни непогоди.