Специјалните единици на Царинската управа во соработка со полициски инспектори на граничниот премин Ќафасан во македонски камион кој пренесувал собни врати за Швајцарија открија и запленија околу 39 килограми марихуана.
Како што информира Царинската управа, вчера околу 14:20 часот на граничниот премин Ќафасан за излез од Република Македонија се пријавил камион со македонски регистарски ознаки управуван од лицето В.К. од село Ливада, Струшко. Камионот бил натоварен со мебел, прозори, врати и гранитни плочки наменети за извоз за физичко лице од Швајцарија. Поради немање на соодветни услови за детален преглед, возилото и стоката во него со царинска придружба се пренесени до царинскиот терминал во Струга.
– При деталниот преглед, царинското куче дало индиции дека во внатрешноста на 20-те собни врати има наркотична материја, поради што една од вратите е избушена со бургија и во неа е пронајдена непозната зеленкаста тревкаста материја. Останатите 19 врати биле рачно скршени и од нив се извадени вкупно 71 паковка полни со марихуана, завиткана во прозирна најлонска амбалажа, соопшти Царинската управа.
Дрогата, возилото и прекршителот се предадени на Одделот за нелегална трговија со дрога при МВР за понатамошно постапување. Против лицето ќе биде поднесена кривична пријава за трговија со дрога.