Министерството за земјоделство, шумарство и водостопанство ги демантира обвинувањата на СДСМ дека Владата нема стратегија за тутунопроизводството.
– Оваа Влада и Министерството за земјоделство, шумарство и водостопанство во ниеден момент ниту крева раменици, ниту ги остава тутунарите неисплатени. Бегање од одговорност и од решавање на проблемите на тутунарите беше својствено на владата на СДСМ, која дури не се потруди да им обезбеди минимални субвенции, стои во реакцијата на Министерството.
Владата и Министерството, како што е наведено, пред почетокот на производството се вклучени во решавање на проблемите со тутунот, настанати поради помалата побарувачка на светскиот пазар.
– Субвенцијата од 60 денари за килограм е потврда дека оваа Влада како никоја претходно, имаше и има разбирање за потребите на земјоделските производители. Тоа што го ветува и го реализира. Министерството за земјоделство порачува, СДСМ да не ги злоупотребува тутунарите во партиски цели нудејќи решенија, кои тие никогаш не ги применуваа како на пример зголемување на субвенциите, следењето на состојбите и откуп на вишок на тутун, стои во реакцијата.
МЗШВ посочува дека се преземени сите мерки за успешно одвивање на откупот, инспекторите се на терен и оти засега е договорено да се откупуваат количествата согласно договорите и да се пријави вишокот тутун.