Во Министерството за животна средина и просторно планирање денеска во Скопје се одржа средба со претстаници на Министерството за животна средина, енергетика и климатски промени на Република Грција.
Како што соопшти МЖСПП, на средбата беа разменети информации во однос на досегашното спроведување на законодавството од областа на управувањето со водите, со посебен акцент на постигнатиот напредок во заштитата на речниот базен на реката Вардар.
Исто така, беше разгледана состојбата со Дојранското Езеро и можноста за соработка и заедничко настапување пред меѓународни донатори за искористување средства за спроведување проекти кои ќе придонесат кон подобро управување со овој воден базен.
Македонската делегација ја потенцираше потребата за изработка на План за управување со Дојранското Езеро како споменик на природата и како прекуграничен воден ресурс. Се разговараше и за продлабочување на соработката во заштитата на биодиверзитетот, особено во заштитата на флората и фауната во пограничните области.
Во рамки на состанокот се разгледаа можностите за продлабочување на соработката во областите кои се од заеднички интерес, како и за интензивирање на координирани акции за аплицирање заеднички проекти пред програмите на ЕУ каде институции од Македонија можат во соработка со институции од Грција да бидат корисници на финансиски средства.
Ова особено се однесува на искористување на средствата од програмите на ЕУ како што се ИПА, LIFE, ADRIATIC, Balkan-Mediterranean и FP7.