Министерството за внатрешни работи на Република Македонија ја демантираше информацијата на руското радио „Гласот на Русија“, дека на Балканот и во западна Македонија има кампови во кои исламски терористи се обучуваат за самоубиствевни бомбашки напади.
„Во континуитет ја следиме безбедносната состојба во Македонија, но и во регионот. Во моментот нема никаков посериозен ризик по безбедноста на граѓаните. Ние сме подготвени веднаш да реагираме и да неутрализирам било каква опасност и закана за безбедносната состојба“, изјави Иво Котевски, помошник министер во МВР за односи со јавноста.
Руското радио објави дека Муслимани од Балканот познати како „белите ѓаволи“ во Македонија, Албанија и Косово се обучуваат за извршување на самоубистени напади. Ова е со цел за да се создаде што побрзо обединета исламска држава на териториите на Босна, Албанија, Косово, Македонија, јужниот дел на Србија и на Црна Гора.
Според „Гласот на Русија“ на Балканот се спроведува исламистичкиот план „Европа 3000“.
Радиото се повикува на руски разузнувачки служби, според кои на неколку места на Балканот се обучуваат идни терористи под закрила на „хумитарни организации“ со пари од оружје и дрога. Целта е да се најдат Муслимани со словенски изглед кои подоцна лесно ќе се движат во Америка и Европа и ќе го спроведуваат планот за создвање исламистичка Европа.
Зад овие обуки, според радиото стои Албанската национална армија (АНА или АКШ). Тоа е всушност организацијата, која е наследник на УЧК.