МВР регистрирала четворица мигранти со сириско потекло кои транзитирале низ земјава под името Ахмад Алмохамед, за кое се претпоставува дека е идентитетот на еден од извршителите на терористичките напади во Париз, во петокот минатата недела, јави „Мета“, повикувајќи се на извори од МВР.
Досега се регистрирани четири лица по име Ахмед Алмохамед, сите по потекло од Сирија, сите со различна година на раѓање и влегле на различен датум.
Во врска со информацијата што ја пренесе грчкиот весник „Прототема“, според која, заедно со Ахмад Алмохамед, патувало уште едно лице, со име Мохамед Алмухамед, од МВР велат дека нема податоци за лице кое под тој идентитет влегло во Македонија.
„Во согласност со извршените проверки во нашите евиденции, констатирано е дека лицето Мохамед Алмухамед досега не е регистрирано и не постојат податоци дека остварило влез во Република Македонија“, стои во дописот од МВР на прашањата на „Мета“.
