Заменик-претседателот на македонската Влада, Муса Џафери, од денеска ќе престојува во дводневна работна посета на Брисел каде што ќе има повеќе средби со високи преставници на Европската унија и на НАТО, јавува МИА.
Како што е најавено, Џафери, кој во Владата е задолжен за спроведување на Рамковниот договор, денеска најпрво во Европскиот парламент ќе се сретне со известувачот за Република Македонија, Ричард Ховит. Потоа, ќе има средба со генералниот секретар на Европската служба за надворешни работи (ЕЕАС), Пјер Вимонт, а попладнето е закажан и состанок со првиот човек на Директоратот за проширување во Европската комисија, Стефано Санино.
Во петок, Џафери во седиштето на НАТО треба да има билатерална средба со заменик-генералниот секретар на Алијансата, Александер Вершбоу. Темата на разговорите на македонскиот вицепремиер со неговите соговорници се очекува да биде спроведувањето на Рамковниот договор и исполнувањето на обврските од него во државата.