Обвинетиот Александар Василевски Нинџа на судењето за настаните од 27 април попладнево го праша обвинетиот разузнавач-агент Мунир Пепиќ дали критичната вечер на 27 април го следел советникот на Амбасадата на Србија во Македонија, т.е. коориднаторот за врска меѓу Безбедносната информативна агенција (БИА) и Управата за безбедност и контраразузнавање, српскиот дипломат, Горан Живаљевиќ.
„Ова е класифициран документ. Не смеам и не можам да одговорам на тоа прашање“, рече Мунир Пепиќ во одговорот на прашањето.
Пепиќ на Нинџа му се обрати со зборовите „господине обвинител“, по што обвинетите почнаа да се смејат.
Обвинетиот Игор Југ, на Мунир Пепиќ му се обрати со зборовите: „Мунире јаране бичу кратак“, по што повторно настана смеа во судницата.
Судијката Кацарска и’ рече на дактилографката да не ги внесува овие зборови на Југ во записникот.
Југ, пак, го потпраша Пепиќ дали да разговараат за шегата со кондурите на Шекеринска.
На денешните сведочења на Пепиќ и на пратеникот Влатко Ѓорчев, обвинетите честопати се смееја при давањето на исказите.
Судењето е во фаза на доказна постапка со изложување одбрана на обвинетите и изведување на нивните докази.
Васко Маглешов