Мостот е симбол на поврзувањето, зближувањето, заедништвото.
Симболично објектот „МОСТ“, во Старата скопска чаршија, објект кој ги спојува општините Центар и Чаир, започна да се приспособува во објект на Универзитетот на Југоисточна Европа.
На свеченоста присуствуваа градоначалниците на Центар и Чаир, Андреј Жерновски и Изет Меџити, професори и студенти .
Ректорот Замир Дика рече дека новиот кампус е нивна инвестиција вредна 600.000 евра со која се надева ќе има корист образованието во Македонија, економијата на главниот град, а пред се ќе помогне и на Старата чаршија.
„Почетокот е на 4. јули, Денот на независноста на САД, најголемиот подржувач на Универзитетот на Југоисточна Европа. Ова е значаен ден за сите нас, бидејќи отвора нови перспективи и визии.Мостот треба да има симболика на спојување, и се надевам дека Универзитетот на југоисточна Европа ќе помогне во спојувањето“, рече ректорот Замир Дика.
Универзитетот се наоѓа токму на општинската граница меѓу Центар и Чаир
„Мостовите поврзуваат, ова симболично место МОСТ ги поврзува општините Центар и Чаир. Но кога на ова место никнува образовна институција, тогаш значењето е повеќекратно. Ќе работиме на нови мостови на зближување и соработка“, рече градоначалникот на општина Центар, Андреј Жерновски.