Министерството за надворешни работи бара од амбасадорот Фуад Хасановиќ да ги врати парите од буџетот на амбасадата во Доха, Катар, кои се ненаменски потрошени, откако констатирало неправилности и отстапување од добрите практики во оваа амбасада.
Како што соопшти МНР, Хасановиќ бил повикан во јуни и јули на консултации во врска со овие сомнежи.
„Согласно конечниот ревизорски извештај се констатираше неправилно управување со дел од ресурсите во амбасадата во Доха од страна на амбасадорот Хасановиќ и истиот е задолжен да го врати износот на средства во целост“, соопшти денеска МНР.
Како што вчера пренесе Канал 5 повикувајќи се на извори во државната ревизија станува збор за сума од околу 50.000 долари.
МНР ги констатирало неправилностите во рамки на системот за внатрешна контрола на работењето во дипломатско-конзуларните претставништва на РМ.
Во тек е правна постапка за нанесената штета во рамки на која се поднесува пријава до надлежните инстанци.