Стекнување лидерски способности преку соодветни вежби за разбирање на концептот на граѓанско општество базирано на демократски вредности и вклучување и учество наспроти конфликт е целта на еднонеделниот Младински лидерски камп што се одржува во Крушево до 24 јуни.
На Кампот, во детското одморалиште „Шула Мина“, учествуваат младинци од 14 до 17 години од цела Македонија кои зборуваат англиски јазик.
Како што соопштија организаторите, Младинската Асоцијација ИМКА од Битола и Мировниот Корпус на Македонија, фокусот на обуките се теми од областа на граѓанскиот активизам, демократските вредности, здравјето, свеста за животната средина, креативни медиуми, управување со проекти,…
Младинскиот Лидерски Камп е една од програмите дизајнирани за поттик и развој на младите луѓе како идни лидери. Целта е градење средина во која младите од различна етничка и верска припадност, неоптоварени од разни проблеми ќе можат заеднички да ги развиваат основните вредности и да учат нови способности за градење на нивниот демократски капацитет, поттикнување на младински активизам, како и способности за личен и професионален развој преку стекнување практични вештини.
Кампот се организира од 2006 година.