Кандидатот за градоначалник на општина Ѓорче Петров од коалицијата „За подобра Македонија“ предводена од ВМРО-ДПМНЕ, Сокол Митровски и директорот на Агенцијата за млади и спорт, Лазар Поповски денеска го посетија игралиштето „Млади Лавови“, кое е опфатено со проектот на ФИФА и УЕФА за покривање со вештачка трева.
Митровски изјави дека и во иднина ќе продолжи соработката со Агенцијата за млади и спорт, бидејќи како што рече, со вложувањето во спортот сме на вистински пат да создадеме здрави генерации.
– На игралиштето „Млади лавови“ вештачката трева ќе се постави веднаш по изборите. На ова место, тренираат неколку групи од различни возрасти. Исто така, нашата сорaботка со Агенцијата за млади и спорт ќе продолжи и понатаму и тоа со доизградба на мултифункционално игралиште во населбата Даме Груев. Ова игралиште во Даме Груев е изолирано од населеното место со цел на луѓето кои живеат во близина да не им пречат спортските активности кои ќе се случуваат во него, рече Митровски.
Директорот на АМС, Поповски додаде дека освен игралиштето во Ѓорче Петров, со вештачка трева ќе бидат обложени уште 11 игралишта.