Собранието на Република Северна Македонија попладнево на продолжението на 22. седница ги избра пратениците Горан Мисовски од НСДП и Фадил Зендели од Беса за потпретседатели на Собранието. Пратеникот Кастриот Реџепи од движењето Беса рече дека станува збор за двајца пратеници со богато политичко искуство кои во целост можат да ја извршуваат оваа значајна функција.
Претходно во рамки на продолженито на 21. седница без расправа во прво читање поминаа 15 закони. Во рамки на 20. седница претходно Добрила Кацарска со 61 глас „за“ беше избрана за судија на Уставниот суд.
Во претпладневиот дел од работата, во рамки на 22 седница, пред утврдувањето на дневниот ред пратениците со 61 глас за, без ниту еден воздржан или против, одлучија по скратена постапка да биде разгледан Предлогот за дополнувања на Деловникот на Собранието на Република Македонија, со што треба да се овозможи пратениците кои се во изолација поради позитивен тест на КОВИД-19 или поради контакт со лице со позитивен тест да можат да се вклучат во работа на Парламентот од далечина или онлајн, поднесен претседателот на Собранието, Талат Џафери.
Тој рече дека сите што имаат забелешки на Предлогот за дополнувања на Деловникот на Собранието, да ги достават и најави дека како предлагач ќе ги разгледа сите забелешки и предлози. Според Џафери, Предлогот, кој е во скратена постапка, по изгласувањето на потребата од носење, треба да помине на Комисија, а потоа пак да се врати на гласање на пленарна седница.
На денешните седници на Собранието не присуствуваа пратениците од ВМРО-ДПМНЕ