Министерот за внатрешни работи Оливер Спасовски денеска одржа протоколарна средба со амбасадорот на Турција во Република Македонија Омур Солендил.
Како што соопшти МВР, амбасадорот Солендил искажал благодарност за досегашната соработка помеѓу двете земји, а особено се заблагодари на поддршката и соработката со Министерството за внатрешни работи. Амбасадорот, како што се наведува, потенцирал дека Република Турција е вистински пријател на Македонија и се залага за нејзино членство во НАТО и ЕУ.
Министерот за внатрешни работи Оливер Спасовски се заблагодарил на поддршката и помошта која Република Турција и ја дава на Република Македонија, оценувајќи ја соработката како исклучително пријателска.
Министерот во кратки црти ги презентираше предизвиците со кои се соочува МВР во овој период, нагласувајќи дека принципот на професионалност и воспоставување на еднакви можности за сите во МВР мора да се почитува.
Спасовски и амбасадорот Солендил, како што стои во соопштението, се согласија дека од интерес на двете земји е соработката да продолжи и во иднина и таа да биде продлабочена.