Министерот за локална самоуправа Лирим Шабани денеска се сретна со евроамбасадорот Аиво Орав.
На средбата, како што информира Министерството за локална самоуправа, Шабани потенцирал дека ќе се залага за рамномерен регионален развој и ја посочил важноста од поддршката на ЕУ.
– Целосно сум посветен на имплементација на процесот на децентрализација, како и на максимално искористување на средствата од ЕУ, преку спроведување на програмите за прекугранична соработка, се вели во соопштението.
Во изминатиот програмски период, како што се наведува, искористени се околу 70 отсто од расположливите средства за прекугранична соработка, со минимум човечки ресурси во Министерството.
Евроамбасадорот Орав му го честитал изборот на министерот Шабани и изразил надеж дека досегашната соработка ќе продолжи и во иднина.
– ЕУ е тука да ги поддржи вашите напори за членство во Унијата, истакнал евроамбасадорот Орав.
Во однос на искористувањето на средствата од ИПА Програмата, Орав, како што се наведува, забележал дека системот на ЕУ е многу бирократски, но оти тоа е неопходно за да се минимизира ризикот од корупција.