Министерот за надворешни работи Никола Попоски ќе учествува на 10. Меѓународен форум за безбедност што од денеска до 24 април ќе се одржи во Женева, Швајцарија.
Како што соопшти МНР, за време на високиот сегмент на Конференцијата кој е предвиден за денеска, Попоски ќе има обраќање во рамките на панел дискусијата на тема: „Ревитализација на ОБСЕ – Невозможна мисија?“.
Во својот настап, министерот Попоски се очекува да се осврне на предизвиците со кои се соочува меѓународната безбедносна заедница во контекст на транзициските процеси во регионот на ОБСЕ. Воедно, тој ќе даде свое видување за новиот „процес Хелсинки + 40“, што е резултат на позицијата на земјите членки да се зајакне организацијата со цел за поефикасно справување со постојните и новите безбедносни предизвици.