Министерот за надворешни работи Никола Попоски денеска го прими амбасадорот на Република Ирска во Република Македонија со седиште во Букурешт, Оливер Гроган.
На средбата, како што соопшти МНР, е разговарано околу континуираната поддршка што Република Ирска ја дава во процесот на целосна евроинтеграција на Република Македонија, поважните активности што ги предвидува Република Ирска за време на нејзиното претседавање, како и за политиката на проширување и процесот на проширувањето на ЕУ во приоритетите и програмата на ирското претседателство.
Министерот Попоски подвлече дека доделувањето датум за почеток на пристапните преговори за време на актуелното претседавање на Ирска со ЕУ ќе биде од историско значење за Република Македонија, правејќи паралела со периодот на поднесувањето и процесуирањето на барањето на Македонија за членство во ЕУ во 2004 година кога Ирска претседаваше со ЕУ.
Ирскиот амбасадор е во посета на Македонија како претставник на земја актуелен претседавач со Советот на Европската унија, што претставува продолжение на воспоставената пракса за претставување на програмата и приоритетите од тековното претседателство пред институциите на Република Македонија.