Министерот без ресор Џери Наумов денес беше во посета на Штип, каде што оствари средба со градоначалникот на Штип, Илчо Захариев, и претставниците на Економскиот совет на Општина Штип.
На средбата се разговараше за условите што Штип може да им ги понуди на потенцијалните инвеститори што сакаат да вложат дел од својот капитал во Македонија.
„Лично сметам дека неговата посета има цел да ја согледа состојбата во општина Штип, односно можностите што им се нудат на инвеститорите, а потоа во неговите контактите со потенцијални инвеститори од Америка да ги запознае со можностите“, изјави Захариев по завршувањето на средбата.
Претставниците на Економскиот совет ја искористија можноста уште еднаш да ја потенцираат потребата од забрзување на административните процедури за откуп на земјиштето, легализација на објектите и издавањето на дозволи за градба.
Министерот Наумов посети и неколку индустриски капацитети во Штип, меѓу кои и текстилниот комбинат „Македонка“, чии хали веќе со години се празни и надвор од употреба.
Поради недоволното познавање на македонскиот јазик, министерот Наумов не сакаше да ги изнесе своите впечатоци од посетата пред новинарите.
М.Р.