Министерот без ресор Едмонд Адеми денеска имаше работна средба со амбасадорот на Израел во Република Македонија Дан Орјан.
На средбата, како што информира кабинетот на министерот, Адеми информираше за усвојување на Информацијата за потребата од изготвување Национална стратегија за соработка со дијаспората 2018/2023, како прв чекор кон систематски и институционален пристап кон дијаспората, како важен столб за развојот на Република Македонија.
– Искуството на Израел во ангажирање и инволвирање на својата дијаспора во политичките, економските, културните и образовните процеси е огромно и има многу што да се научи од нив. Верувам дека заедничката соработка во периодот што следи, ќе биде од огромно значење за нас, со што дополнително ќе се зајакне пријателството меѓу Република Македонија и Израел, посочил министерот Адеми на средбата.
Амбасадорот Орјан истакнал дека дијаспората е многу важен партнер и додал оти Израел има големо искуство во оваа област и најавил разменување на нивните искуства.
