Министерката без ресор задолжена за странски инвестиции, Зорица Апостолска денеска имаше средба со амбасадорот на Кралството Холандија во Македонија, Вилем Ваутер Пломп.
На средбата, како што соопшти владината прес-служба, било изразено задоволство од долгогодишната добра економска соработка помеѓу двете земји и било констатирано дека постои простор за натамошно унапредување на бизнис релациите помеѓу холандските и македонските компании.
Соговорниците дискутирале и за економските сектори во кои холандските компании би имале интерес да инвестираат во Република Македонија, при што како можни сектори биле посочени хај-тек индустријата, туризмот, земјоделството и хортикултурата, како и текстилната индустрија.
Министерката Апостолска ги презентирала можностите за инвестирање во Република Македонија информирајќи го амбасадорот за политиките на Владата за странските инвестиции, како и за новиот модел за привлекување нови инвеститори. Таа ја нагласила важноста од транспарентност во целокупниот процес на привлекување инвестиции и еднаквиот третман на домашните и странските компании.
На крајот била договорена следна средба на Апостолска и Пломп во амабасадата на Кралството Холандија во Македонија, на која ќе присуствува и претставник на Македонско-холандската стопанска комора, а ќе се разговара за проширување на можностите за влез на холандски капитал во земјава.