Екипите на зимската служба на Град Скопје во текот на изминатата ноќ фрлија 113 тони сол на градските булевари и улици, кои во моментов се расчистени и проодни.
Како што соопшти Град Скопје, интензивно се работи на терен на расчистување на снегот при што ЈП „Комунална хигиена“ со 100 работници го расчистува снегот и мразот од тротоарите и од јавните површини.
Во централното градско подрачје, расчистувањето се врши на плоштадите: „Македонија“, „Пела“ и ВМРО, се расчистува Старата Чаршија, како и пешачките патеки и тротоарите на мостовите: „Гоце Делчев“,„Око“,„Слобода“, Камениот мост, Мостот на уметноста и Мостот на револуцијата.
Екипите на ЈП „Комунална хигиена“ – Скопје, пак, во моментов работат на расчистување на снегот на повеќе улици и булевари. Во општината Центар се работи на ВМРО, Димитрија Чуповски, Филип Втори, 11-ти Октомври, Крсте Мисирков, Мајка Тереза, Кочо Рацин и Илинденска, во општината Карпош на Партизанска, во општината Кисела Вода се расчистува на потегот од 11-ти Октомври до Градската болница и бул. Борис Трајковски.
Во општината Аеродром во тек е расчистување на снегот од булеварите Јане Сандански и Кузман Ј. Питу, во општината Чаир на булеварот Втора македонска бригада и улиците: Кемал Сејфула, Џон Кенеди, Христијан Т. Карпош и Цветан Димов, во општината Бутел на Кемал Сејфула, Александар Урдаревски, Босна и Херцеговина, во општината Гази Баба – булеварот Александар Македонски, Војводина, Коце Металец и на Благоја Стефковски и во општината Ѓорче Петров на истоимената улица.
Расчистување се врши и пред Владата и Собранието на РМ, како и на просторот пред Градската болница.
Во првата смена, во расчистувањето на снегот се ангажирани вкупно 100 работници, додека од механизацијата се користат: шест мотокултиватори, едно специјално возило „хијета“, како и три патарки за расфрлање сол.
Активностите на ЈП „Комунална хигиена“ – Скопје ќе продолжат во текот на целиот ден.
Градот Скопје препорачува до возачите да возат внимателно и да се придржуваат на условите на коловозите. Воедно, апелираат до граѓаните, куќните совети и сопствениците на деловните објекти да се придржуваат до законската обврска за чистење на снегот од приодите до нивните објекти.