Дополнувањата на Статутот на ВМРО-ДПМНЕ од страна на Централниот комитет претставуваат негова модернизација и заслужуваат да бидат поздравени, напиша Антонијо Милошоски на неговиот фејсбук профил.
„Значаен чекор напред во непосредната внатрепартиска демократија е воведувањето на непосреден избор од страна на членството на идните кандидати за општински советници, и идните кандидати за градоначалници. Минатиот труд, личниот углед, довербата кај членството и капацитетот на кандидатот да се носи со обврските на овие позиции ќе добијат на тежина“, напиша Милошоски.
Милошоски смета дека ограничувањето на мандатот на Претседателот на партијата е значаен исчекор кој според него ќе поттикне внатрепартиски кадровски натпревар и демократизација на партијата.
„Ограничувањето на мандатите на Претседателот на партијата и претседателите на ОК е нов значаен исчекор, со кој за прв пат актуелното раководство на ВМРО ДПМНЕ става до знаење дека долговечноста на партиската функцијата не е цел сама за себе, туку дека партијата има доволно ресурси за редовно освежување на кадровските постави. Ваквиот циклус ќе внесува нова внатрепартиска динамика и кадровски натпревар, што ќе биде значајна демократска алатка за мотивација на активните членови.
И за крај, во рамките на секоја партија или држава, сосема доволна чест, обврска и престиж е некој да биде претседател на партијата, на државата, на владата, градоначалник или министер, па затоа титуларните функции “почесен претседател, почесен градоначалник, почесен премиер” и слично, немаат некоја суштинска кадровска улога и подобро е за секого честа да си ја задржи кај членството и граѓаните, наместо истата да биде врамена во плакета“, вели Милошоски.
Милошоски преку својот статус го поздравува формирањето на Форум на интелектуалци како и Унија на ветерани кое според него е многу корисно и се очекува овие две тела да го зголемат опсегот на делување во рамките на своите целни групи со нови идеи, проекти и совети.