Пратеникот на ВМРО-ДПМНЕ, Антонијо Милошоски на прес-конференција информираше дека добиле неофицијална информација дека собраниското мнозинство ја одбива Предлог-одлуката за формирање на Анкетна комисија која што ја поднеле, како што вели, за да се утврдат постапките и недостатоците при изградбата и примопредавањето за употреба на модуларната болница во Тетово, која што беше опожарена и како резултат на тоа настрадаа 14 луѓе.
„Сметаме дека со ваквиот потег, парламентарното мнозинство не сака да се расчисти овој случај и не сака да добијат одговор прашањата кој ја носи политичката и кривичната одговорност за оваа трагедија која чинеше 14 човечки животи.
Сметаме дека г-динот Зоран Заев се’уште тактизира за да го заштити министерот Филипче, а пратеничкото мнозинство СДСМ – ДУИ за да ги заштити и надлежните во Општина Тетово и во клиничката болница во Тетово“, кажа Милошоски.
„За жал заштитата на нивните партиски кадри, министерот Филипче, заменикот министер од ДУИ, директорот на болницата од ДУИ и другите надлежни во општината Тетово им е поважна на власта отколку дознавањето на вистината за одговорноста за оваа голема здравствена и човечка трагедија.
Се надеваме дека преку медиумите и преку овој апел ќе успееме и понатаму да поттикнеме да се истражува овој настан, да не се заборави, се додека нема морална, политичка и кривична одговорност“, додаде пратеникот.