Антонијо Милошоски на денешната седница постави прашање до премиерот Зоран Заев за писмото испратено од амбасадорот на САД, Џес Бејли до основниот суд Скопје 1, до Владата преку Министерството за правда и до Судскиот совет.
„Дали ова писмо во кое се цитира разочарувањето на амбасадорот од злоупотребата е и ваше разочарување а е во врска со местење на одредени судски процеси при изрекување на мерки притвор. Дали Владата ќе покрене иницијатива до Судскиот совет да покрене истрага кои судии злоупотребиле странска амбасада за местење судски пресуди. За амбасадор да напише такво писмо, тоа не е лично писмо, тој за ова претходно го известил Стејт Департментот. Ова е дипломатско-судски скандал“, рече Милошоски.
„За ова дознав од медиумите и сум загрижен. Дане Талевски советникот за надворешни работи доби задача да се сретне со амбасадорот, но тој заминал за САД. Сфатив дека има шпекулации дека некој сакал да влијае и не разбрав каде е сомневањето. Повеќе ја сфатив пораката да не се злоупотребува амбасадата Никој да не се вади на амбасадата. Ќе преземеме одредени дејства да видиме зошто е дојдено до тоа. На министерката и на моите советници им кажав да се разговара со заменикот или кога амбасадорот ќе се врати. Министерката за правда ќе добие инструкции да го отвори прашањето на Судски совет“, одговори Заев.