На прашањето за спроведување демократска изборна атмосфера во услови на техничка Влада, лидерот на опозициската ВМРО-ДПМНЕ, Христијан Мицкоски, функционирањето на техничката Влада досега го оцени како нефер и недостоинствено во процесот на спроведувањето на изборните активности. Тој уште еднаш го повика лидерот на СДСМ, Зоран Заев, на ТВ-дуел да ги соочат аргументите.
„ТВ-дуелот е добра алатка за соочување за време на изборите. Јас се надевам дека Зоран Заев ќе се охрабри и ќе излезе на дуел да ги соочиме аргументите за тоа дали блескаме и сме на прав пат или ѝ треба обнова на Македонија. Јас веќе реков дека имам прифатено неколку понуди и стојам на располагање“, рече Мицкоски.
Што се однесува до листите на кандидатите за пратеници, Мицкоски најави дека помеѓу први и петти март ќе се знаат имињата на носителите на листите, а не подоцна од 10 март и листатата на кандидати за пратеници.
„На листите ќе се најдат повеќето од луѓето што првпат ќе се појават на листа, но ќе има и кандидати за пратеници што се искусни заради поефикасна работа и улога во работата на парламентот“, рече Мицкоски.
Во однос на случајот „Рекет“, Мицкоски уште еднаш повтори дека институциите се на потег да го расветлат случајот и, како што рече, да ја откријат главата на октоподот.
„Jасна е ситуацијата – која е главата на октоподот во случајот „Рекет“ – и тука не треба да решаваме ребуси. Вчера слушнавме како Зоран Заев бара правда, но, најверојатно, неговиот обид за правда е барање нова амнестија. Притвореничката Јанева, за која З. З. тврдеше дека само еднаш се сретнала со него, во ПИ-мерките се покажа дека таа се среќавала со многу други луѓе блиски до Заев, неговиот брат, братучед, и тоа не биле разговори за критика за романи, туку за бизнис-зделки. Ако Јанева одела на средба во Владата, сигурно не се среќавала со обезбедувањетo, претпоставувам со Зоран Заев и дека тема на муабетот биле разговори поврзани со случаи од СЈО. Затоа, уште еднаш барам транспарентен и целосно законски процес на институциите, кои сега се на потег“, рече Мицкоски.
Тој уште еднаш спомена дека законите за Јавното обвинителство и за Советот на јавните обвинители биле донесени со кршење на процедурите и Уставот, но дека народот сфатил и на 12 април граѓаните нема да го простат тоа.