Претседателот на ВМРО-ДПМНЕ, Христијан Мицкоски изјави дека ова е тежок ден за Македонија и дека премиерот Заев се обидува поразот да го прикаже како победа. Тој рече дека Заев прифатил капитулација и побара задолжителен референдум.
Мицкоски рече дека нашето право за јазик и националност е нешто што е претходно гарантирано и потпишано во ОН.
– Заев вештачки се смее, се гледа дека ова е пораз, рече Мицкоски.
Тој замери што преговорите се водени во тајност и рече дека ВМРО-ДПМНЕ не биле вклучени. Мицкоски кажа дека денеска имале телефонски разговор и побара да го добие договорот што е можно поскоро.
Претседателот на ВМРО-ДПМНЕ истакна дека владата не е надлежна институција за потпишување на вакви договори, туку тоа треба да го прави претседателот на државата.
– ВМРО-ДПМНЕ нема да поддржи промена на Устав со цел промена на уставното име, рече Мицкоски и напомена дека Заев се обидува шверцерски да го протне во Собрание овој договор.
– Референдумот за името мора да биде задолжителен, а не консултативен, потенцираше Мицкоски.
-Заев најпрво беше против промена на уставот, па прифати географска одредница, потоа за да кажува дека со Илинденска Македонија го потврдувал идентитетот и кажуваше дека друго решение за него не постои. Но како и секогаш, така и сега, излажа. Ова е премногу сериознио прашање и затоа бараме таканаречениот договор кој Зоран Заев има намера да го потпише веднаш да ни го достави, рече Мицкоски.