Премиерот Христијан Мицкоски изјави дека бил изненаден од одлуката на Обвинителството за гонење организиран криминал и корупција да не покрене постапка во случајот со набавката на мазут за ТЕЦ „Неготино“, во кој беа опфатени 13 лица, меѓу нив и сопствениците на „Пуцко Петрол“, Ратко Капушевски и поранешниот директор на ЕСМ, Васко Ковачевски.
Мицкоски рече дека со „неверување“ ја примил информацијата дека според обвинителството не постоеле докази за незаконски дејствија во постапката за набавка на мазут.
Тој најави дека АД ЕСМ ќе поднесе жалба на ваквата одлука и изрази очекување случајот повторно да биде разгледан.
Премиерот индиректно го критикуваше шефот на ОЈО ГОКК, Ислам Абази, посочувајќи дека јавноста веќе имала можност да слушне коментари за неговото работење.
Според Мицкоски, за одлуката разговарал и со државниот јавен обвинител Ненад Савески, кој, како што тврди премиерот, не бил информиран за исходот од истрагата.