Додека Заев се слика, јужниве слават, рече претседателот на ВМРО-ДПМНЕ, Христијан Мицкоски на денешниот протестен марш во Битола. Тој рече дека и покрај беспарицата и невработеноста, лошите услови во здравството и обраозванието, Македонија се соочи со најголемото предавство – потпис на договорот за промена на уставното име.
– Македонија е нашето име. Тоа се изговара со посебно чувство и почит. Македонија е она што сме и ќе останаме, тоа е нашата татковина и дедовина. Македонија останува нашата иднина, рече Мицкоски и додаде дека на Македонија сега ѝ се потребни енергијата и мудроста на народот.
– Не престанувајте да го употребувате името Македонија. Македонија е основна причина за секој наш чекор. Нашите претци ги положиле своите животи за независна Македонија. Тоа било борба за човечки правдини, без разлика на етничката припадност. ВМРО-ДПМНЕ е за заеднички покрив, под кој сите живееме, продолжи тој..
Мицкоски додаде дека иако денес е роденденот на партијата, тие не слават бидејќи ова се тешки околности.
– Македонија е зафатена од ураган наречен Зоран Заев. Но иднината зависи од нас, не од него. Заев и СДСМ овој договор го претставуваат како победа, но всушност е пораз. Со договорот е променет идентитетот на Македонците, рече Мицкоски и додаде дека со сите демократски методи ќе се борат против промената на уставното име.
– По ниту една цена нема да ја поддржиме капитулацијата на Заев. Ќе дојде часот кога ќе одговараат пред граѓаните, рече Мицкоски.
Лидерот на ВМРО-ДПМНЕ претходно кажа дека на овој ден се основани месните комитети на ВМРО-ДПМНЕ.
Виктор Јованов