Општина Аеродром ќе гради нов парк во населбата Мичурин, спроти ОУ „Блаже Конески“.
Новиот проект ги вклопува постојните елементи, односно детското и спортско игралиште, патеките и дрвјата и предвидува нивна целосна обнова, поставување нови и дополнителни реквизити и урбана опрема.
– Идејното решение максимално ќе ги користи постојните зелени површини, а проектирани се и нови зелени површини и богато хортикултурно уредување. Овој парк, што ќе се гради по долгогодишно барање на жителите од овој дел на Аеродром, ќе биде прилагоден за сите возрасти, соопшти општина Аеродром.
За проектот се издвоени околу девет милиони денари од Буџетот на општина Аеродром. Активностите на терен ќе почнат веднаш по изработката на основниот проект и добивање одобрение за градење.
