Пратеничката група на ВМРО-ДПМНЕ и Коалицијата дојде до Влада со барање за остра и брза реакција и итно започнување и разрешување на државниот секретар во Министерството за култура, Валмир Азири, рече Никола Мицевски, координатор на пратеничката група на ВМРО-ДПМНЕ.
„За потсетување, можам да Ви кажам дека пратениците како директни претставници и застапници на граѓаните во законодавниот дом ја бираат Владата, а токму Владата ги назначува своите владини функционери.
Имено, овој владин функционер вчера повикуваше на физичко насилство со нанесување на тешки телесни повреди и ова е кривично дело според членот 394-г од Кривичниот законик, дело со кое што се предвидува казна затвор од една до пет години“, кажа Мицевски.
„Токму поради тоа и поради сериозноста на овој инцидент, а и траорноста на вчерашниот ден за демократијата во Република Македонија, дојдовме и лично го поднесовме барањето за остра реакција од претседателот на Владата, г-динот Димитар Ковачевски, од кој што се бара брза реакција бидејќи само на тој начин ќе покаже дека е противник на повиците за физичко насилство врз народните избраници и ќе упати силна порака до сите дека ова повеќе не смее да се повтори.
Во спротивно, доколку одлучи да молчи, само ќе докаже и покаже дека охрабрува и дека одобрува секаков вид на насилство и насилничко однесување. На потег е Владата и на потег е премиерот Димитар Ковачевски“, изјави Никола Мицевски, координатор на пратеничката група на ВМРО-ДПМНЕ.