Пензионерите од Струга денеска на работилница имаа можност да се запознаат со своите права и постапки во однос на плаќањето партиципација, рефундирањето средства од лекови, специјалистички консултации, како и за побрзо остварување на здравствената услуга.
На едукативната работилницата присуствуваа директорот на Фондот за здравствено осиугрување Џемали Мехази и секретарот на Здружението на пензионери во Струга Мирко Трпоски.
Струшките пензионери, според Трпоски, најмногу се жалат на плаќањето партиципација за услугите. Тој смета дека не е во ред да бидат изложени на дополнителни давачки по какви било анализи или прегледи.
Во однос на поплаките од пензионерите за плаќањето партиципација, директорот Мехази посочи дека секој осигуреник, меѓу кои и пензионерите имаат право да пријават за незаконско наплаќање за здравствените услуги.
– Осигурениците кои се сомневаат за бесправно наплаќање или им се скратува некое право можат директно во подрачната служба на Фондот да пријават анонимно за да не се плашат од евентуални реперкусии, а нашите контролори ќе излезат на терен, рече Мехази.
Доколку Фондот констатира дека има бесправна наплата на партиципација, според него, Здравствената установа се задолжува да ги врати парите или Фондот ќе ги рефундира.
– Нема да дозволиме ниту едне осигуреник бесправно да биде оштетен, нагласи Мехази.
На работилницата пензионерите имаа можност да слушнат за сите новини преземени годинава како резултат на измена на подзаконски акти, кои се однесуваат на областа на здравственото осигурување.